L'adminnistrâtion tchi mène l'activité entouor les langues d'ichîn, minnoritaithes et mains faites sèrvi est l'Gouvèrnément Gallouais.
Les Adminnistrâtions Înscrites du Conseil Britannique-Irlandais lus vantent d'un riche héthitage lîndgistique tch'est un êlément împortant d'la tchultuthe dé ches îles. D'sithant souôt'nîn les langues d'ichîn, minnoritaithes et mains faites sèrvi (LIMs) chu sujet fut ajouôté à la cliôsée d'travâl'lies du CBI à la traîsième haute rêunnion au mais d'Juîn 2002.
La travâl'lie s'en d'mente des LIMs siévantes: l'Irlandais, l'Gallouais, l’Êcôssais, lé Scots, lé Scots d'Ulstèr, lé Manx, lé Jèrriais, l'Dgèrnésiais et l'Cornouaillais
La travâl'lie aîgue à identifier et chârer la miyeu pratique lé travèrs des adminnistrâtions înscrites et dans des c'meunautés d'LIMs. À la traîsième rêunnion minnistéthielle à Cardiff lé 24 d'Octobre 2014, les Minnistres accordîtent qu'la chédule du travas à v'nîn pouor 2015-16 étha coumme clious:
L'ensîngnage des langues dites LIMs ès grandes pèrsonnes;
la markét'tie et la chang'gie d'accouôteunmes entouor des langues dites LIMs;
l's arts et les langues dites LIMs;
la technologie et les médias digitaux;
l'êcononmie; et
la c'meunauté.
En d'houors des rêunnions rédguliéthes d'officièrs, la travâl'lie a organnîsé des distchut'ties pouor les dîtheurs d'politique et faîtheurs à seule fîn d'avanchi la châr'rie d'bouonne pratique entré les cheins tchi travâlent dans la cliôsée d'LIMs. Châque distchut'tie s'en d'mente d'un difféthent propos du mandâtion d'la travâl'lie. Nou griyit eune distchut'tie au mais d'Novembre 2012 tchi s'en d'mentit d'la promotion des langues dites LIMs atout l'ensîngnage ès preunmiéthes années. Nou trouv'tha eune sélection des présentâtions d'la distchut'tie pus bas. Eune distchut'tie entouor la bouonne pratique dans la législâtion et la politique des langues dites LIMs fut grée â Êdîmbourg au mais d'Novembre 2013. Les dêfinnissâles sont à siéthe par chu lian-chîn
L's avis des deux distchut'ties fûtent considéthés à la traîsième rêunnion Minnistéthielle d'la travâl'lie tch'eut lieu à Cardiff et tchi fut présidée par l'Preunmié Minnistre dé Galles, lé Bein Honothabl'ye Carwyn Jones MA. Les c'meunitchis d'la rêunnion sont:
